കന്നഡ സിനിമാ ലോകത്തിന് പുതിയൊരു ചരിത്രമെഴുതിയ ‘കാന്താര’യുടെ പ്രീക്വൽ പടം അടുത്ത വർഷം തിയേറ്ററുകളിലെത്തും. ‘കാന്താര എ ലെജൻഡ് ചാപ്റ്റർ 1’ എന്ന പേരിൽ പുറത്തിറങ്ങുന്ന ചിത്രം 2025 ഒക്ടോബർ രണ്ടിന് പ്രദർശനത്തിനെത്തുമെന്ന് നിർമ്മാണ കമ്പനിയായ ഹോംബാലെ ഫിലിംസ് ഔദ്യോഗികമായി പ്രഖ്യാപിച്ചു.
ആദ്യ ചിത്രത്തിന്റെ വിജയത്തിന് പിന്നാലെ വരുന്ന ഈ പ്രീക്വൽ പതിപ്പ് കഡംബ രാജവംശത്തിന്റെ കാലഘട്ടത്തിലേക്കാണ് സഞ്ചരിക്കുന്നത്. പ്രാദേശിക സംസ്കാരവും ആചാരങ്ങളും ഭക്തിയും കൂട്ടിയിണക്കി, ചരിത്രപരമായ സംഭവങ്ങളെ വെള്ളിത്തിരയിൽ പുനരാവിഷ്കരിക്കുന്ന ചിത്രത്തിൽ റിഷഭ് ഷെട്ടി തന്നെയാണ് പ്രധാന വേഷത്തിലെത്തുന്നത്.
നേരത്തെ പുറത്തിറങ്ങിയ ഫസ്റ്റ് ലുക്ക് ടീസർ സോഷ്യൽ മീഡിയയിൽ വൻ വിജയമായിരുന്നു. ഏഴ് ഭാഷകളിൽ പുറത്തിറങ്ങിയ ടീസർ യൂട്യൂബിൽ മാത്രം 33 ദശലക്ഷത്തിലധികം കാഴ്ചക്കാരെ ആകർഷിച്ചു. ടീസറിന്റെ സാങ്കേതിക മികവ് ഗൂഗിളിന്റെ ശ്രദ്ധയിൽപ്പെട്ട് അവരുടെ ഔദ്യോഗിക സോഷ്യൽ മീഡിയ അക്കൗണ്ടുകളിലും പ്രത്യേക പരാമർശം നേടിയിരുന്നു.
ആദ്യ ചിത്രത്തിലെ ശിവ എന്ന കഥാപാത്രത്തിന്റെ പിതാവിന്റെ കഥയാണ് പുതിയ സിനിമയിൽ അവതരിപ്പിക്കുന്നതെന്ന് റിപ്പോർട്ടുകളുണ്ട്. “ഇത് വെറും പ്രകാശമല്ല, ദർശനമാണ്” എന്ന ടാഗ് ലൈനോടെയാണ് റിലീസ് തീയതി പ്രഖ്യാപനം വന്നിരിക്കുന്നത്. യാതൊരു പ്രചാരണവുമില്ലാതെ പുറത്തിറങ്ങി ബോക്സ് ഓഫീസിൽ വൻ വിജയം നേടിയ ആദ്യ ചിത്രത്തിന്റെ പാരമ്പര്യം നിലനിർത്തി, കൂടുതൽ വിസ്മയകരമായ സിനിമാനുഭവം സമ്മാനിക്കുമെന്നാണ് അണിയറ പ്രവർത്തകർ വാഗ്ദാനം ചെയ്യുന്നത്.
English Summary:
