ദക്ഷിണേന്ത്യൻ സിനിമയിലെ പ്രമുഖ താരം നയൻതാരയുടെ തുറന്ന കത്തിന് ശക്തമായ പിന്തുണയുമായി രംഗത്തെത്തിയിരിക്കുകയാണ് നടി പാർവതി തിരുവോത്ത്. സ്ത്രീകൾ നേരിടുന്ന വെല്ലുവിളികളെക്കുറിച്ചും സിനിമാ മേഖലയിലെ അനുഭവങ്ങളെക്കുറിച്ചും നയൻതാര പങ്കുവച്ച തുറന്ന കത്ത് ഒരു യഥാർത്ഥ പ്രശ്നത്തെയാണ് അടയാളപ്പെടുത്തുന്നതെന്ന് പാർവതി അഭിപ്രായപ്പെട്ടു.
“ലേഡി സൂപ്പർസ്റ്റാർ എന്ന് വിശേഷിപ്പിക്കാവുന്ന, സ്വയം കരിയർ കെട്ടിപ്പടുത്ത ഒരു താരം ഇത്തരമൊരു കത്തെഴുതേണ്ടി വന്നത് തന്നെ ഗൗരവമേറിയ വിഷയമാണ്,” പാർവതി ചൂണ്ടിക്കാട്ടി. മൂന്നു പേജുകളിലായി നയൻതാര പങ്കുവച്ച അനുഭവങ്ങൾ വെറും ആരോപണങ്ങളല്ലെന്നും, അവയിൽ സത്യമുണ്ടെന്ന് പിന്തുണയ്ക്കുന്നവർ എല്ലാം വിശ്വസിക്കുന്നുവെന്നും അവർ വ്യക്തമാക്കി.
സ്വന്തം അനുഭവങ്ങൾ പങ്കുവച്ച പാർവതി, അവകാശങ്ങൾക്കായി ശബ്ദമുയർത്തുമ്പോൾ നേരിടേണ്ടി വരുന്ന ഒറ്റപ്പെടുത്തലിനെക്കുറിച്ചും സംസാരിച്ചു. “സൈബർ ആക്രമണങ്ങൾ ഒരു തരത്തിലുള്ള കുറ്റകൃത്യമാണ്. പക്ഷേ അത്തരം നെഗറ്റിവിറ്റികളെയെല്ലാം അതിജീവിച്ചാണ് നയൻതാര ഇന്നത്തെ നിലയിലെത്തിയത്,” അവർ കൂട്ടിച്ചേർത്തു.
“എല്ലാവർക്കും ഈ വിഷയത്തിൽ പിന്തുണ നൽകാൻ സാധിച്ചെന്ന് വരില്ല. എന്നാൽ പിന്തുണയുടെ അഭാവം എന്താണെന്ന് നേരിട്ടറിഞ്ഞ വ്യക്തിയെന്ന നിലയിൽ, പ്രത്യേകിച്ചും സ്ത്രീകൾ ന്യായത്തിനായി പോരാടുമ്പോൾ, അവർക്ക് എന്റെ പിന്തുണ എപ്പോഴുമുണ്ടാകും,” പാർവതി തന്റെ നിലപാട് വ്യക്തമാക്കി.
English Summary:
